Aínda que dun xeito que hai uns meses xamais imaxinariamos, comezan hoxe as nosas vacacións de Semana Santa e, dito sexa de paso, estamos tamén a rematar a terceira semana de confinamento como uns heroes e heroínas que sodes sen lugar a dúbidas. Noraboa por levalo tan ben, por traballar tanto e por serdes, en definitiva, un alumnado exemplar.
A partir de hoxe tócavos descansar -que o tendes ben merecido!-. Tócavos desfrutar do sol, da poesía, dunha peli divertida, dos debuxos -dos vosos, dos dos outros e dos animados-, correr -os que poidades-, rir, falar, escoitar ós maiores... non deixedes de facelo nin de gozar das pequenas cousas do día a día e das que tendes a sorte de ter. Sodes moi afortunados. Non o esquezades.
Como sempre facemos neste blogue, tamén vos recomendamos ler un pouquiño todos os días, non como unha obriga, senón como un dos máis marabillosos dos placeres. Collede a lectura con cariño, non como unha imposición, desfrutade coas historias... se conseguides que os libros sexan os vosos amigos, nunca máis vos ides sentir sós.
En definitiva... SEDE MOI FELICES.
O profesorado do CEIP de Baños de Molgas mandámosvos unha aperta enorme e os nosos mellores desexos para estas vacacións.
Feliz Pascua e... boas lecturas!
Comments